काठमाडौँ – आजका पत्रपत्रिकामा विकास निर्माण तथा वातावरणीय मुद्दाका विभिन्न विषयमा समाचार छापिएका छन्।
कान्तिपुर
-आजको कान्तिपुरमा गिट्ठाका भरमा चिया मजदुर भन्ने शिर्षकमा अर्जुन राजवंशीको समाचार छापिएको छ । चिया बगानमा ४० दिनदेखि मजदुर आन्दोलन छ । ऐन र नियमावलीअनुसार सुविधा माग गर्दै आफैंले थालेको अनिश्चितकालीन आन्दोलनका कारण बगान र कारखानामा कार्यरत श्रमिक भने समस्यामा पर्न थालेका छन् ।
-हिलो र धूलोले आजित बौद्धवासीले रोके सडक भन्ने शिर्षकमा समाचार छापिएको छ । जोरपाटी नारायणटार सडक खण्ड कालोपत्रेको मागसहित प्रदर्शनमा उत्रेका सर्वसाधारणमाथि प्रहरीले लाठिचार्ज गरेको छ । बिहीबार बिहानदेखि उक्त क्षेत्रका बासिन्दा, व्यवसायी र जनप्रतिनिधि विरोध गर्न उत्रिएपछि प्रहरीले लाठिचार्ज र अश्रुग्यास प्रहार गरेको थियो ।
-घरैपिच्छे माछा पोखरी भन्ने शिर्षकमा समाचार छापिएको छ । बढैयाताल गाउँपालिका ५ र त्यस आसपास क्षेत्रमा साढे २ सयभन्दा बढी माछा पोखरी छन् । झन्डै दुई सय स्थानीय बासिन्दाले व्यावसायिक माछापालन गरी आर्थिक अवस्था सुधारेका छन् । स्थानीय मीनराज पंगेनी, पुष्प भुसाल, सीताराम चौधरी, रामप्रकाश चौधरी र भक्तराम थारूलगायत किसानले माछाबाटै राम्रो आम्दानी लिइरहेका हुन् ।
अन्नपूर्ण पोष्ट
-आजको अन्नपूर्ण पोष्टमा आगोले दैनिक जल्छन् बस्ती भन्ने शिर्षकमा गोपाल शर्माको समाचार छापिएको छ । गर्मी सुरु भएसँगै दाङमा दैनिक आगलागीका घटना भएका छन्। दुर्गम पहाडी क्षेत्र, पानीको अभाव र वनक्षेत्र नजिकै रहेको बस्तीमा दैनिकजसो आगलागीका घटना भइरहेका छन्। वनमा लागेको डढेलो गाउँमा पस्दा पछिल्ला चार दिनमा दाङमा ३० घरमा आगलागी भएको छ। घोराही, शान्तिनगर र तुलसीपुरका बस्तीमा आगलागीका दैनिक घटना भइरहेका छन्।
नयाँ पत्रिका
-आजको नयाँ पत्रिकामा बुढीगण्डकीमा माफियाको चलखेल भन्ने शिर्षकमा पुष्प कोइरालाको समाचार छापिएको छ ।कमिसनको खेलमा राष्ट्रिय गौरवको बुढीगण्डकी जलविद्युत् आयोजनाको क्षमता घटाउने प्रयास भइरहेको छ । जलमाफियाहरूको योजनाअनुसार प्रधानमन्त्री कार्यालयले १२ सय मेगावाटको आयोजनालाई आठ सय मेगावाटमा खुम्च्याउन छलफल थालेको छ । क्षमता घटाएर चिनियाँ कम्पनी चाइना गेजुवा ग्रुप कम्पनी ९सिजिजिसी०लाई आयोजना सुम्पिने प्रधानमन्त्री केपी ओलीको योजना छ । यसका लागि कम्पनीका नेपाल एजेन्ट दीपक भट्ट र सुशील भट्ट राजनीतिक लबिङमा छन् । भट्ट दाजुभाइ ठूला ठेक्कामा विदेशी कम्पनीको एजेन्टका रूपमा काम गर्छन् ।
नागरिक
-आजको नागरिकमा तरकारी भाउ पोहोरभन्दा दोब्बर महँगो भन्ने शिर्षकमा दिलीप पौडेलको समाचार छापिएको छ । सरकारले दैनिक उपभोग्य वस्तुको मूल्य वृद्धि नियन्त्रण भएको दाबी गरिरहँदा बजारमा अधिकांश तरकारीको भाउ पोहोरभन्दा दोब्बर महँगो भएको छ। तरकारीको मूल्य अचाक्लि वृद्धि हुँदा भान्छा चलाउन हम्मे परेको छ।
