काठमाडौँ— नेपाल पर्यटन बोर्डले शुुक्रबार सार्वजनिक गरेको ‘नेपाल भम्रण वर्ष सन् २०२०’ को लोगोको विषयलाई लिएर व्याापक आलोचना भएपछि बोर्ड त्यसमा केही परिवर्तन गर्ने निष्कर्षमा पुगेको छ ।
बोर्डले आएका सुझावहरुका आधारमा केही परिवर्तन हुने तर पुरै परिवर्तन भने गर्न नसकिने जनाएको छ । लोगो सार्वजनिक गरेलगतै लोगोको विषयमा विशेषगरी सामाजिक सञ्जालमा त्यसको व्यापक आलोचना भइरहेको छ ।
‘लोगो सार्वजनिक भएपछि धेरैको फिडव्याक आइरहेको छ । सकेसम्म राम्रो होस् भन्ने हामी चाहान्छौं,’ नेपाल पर्यटन बोर्डका प्रमुख कार्यकारी अधिकृत दिपकराज जोशीले भने ।
कार्यकारी अधिकृत जोशीले लोगोमा मुख्य परिवर्तन नहुँने बताएका छन् । ‘लोगोमा लगाइएका सानो–सानो रङ्ग मात्र परिवर्तन गर्न सकिन्छ । तर मुख्य भाग परिवर्तन हुँदैन,’उनले भने ‘लोगोबारे आएको प्रतिक्रियाहरु मुल समितिलाई बुझाउँछौ त्यसपछि परिवर्तन गर्ने नगर्र्ने निर्णय हुन्छ ।’
पर्यटनमन्त्री रविन्द्र अधिकारीको अध्यक्षतामा गठन गरिएको मूल समितिले वैशाख २५ गते उत्कृष्ट ५ लोगोमध्येबाट काठमाडौं बौद्धका ग्राफिक डिजाइनर उद्धव रिमालले बनाएको लोगोलाई छानेको थियो ।
भम्रण वर्षका लागि नेपाल पर्यटन बोर्डले फेसबुकमार्फत लोगोका लागि सूचना आव्हान गरेको थियो । फेसबुकमार्फत १ सय ४५ वटा लोगो प्राप्त भएको पर्यटन बोर्डले जनाएको छ । तीमध्येबाट उद्धव रिमालले पठाएको लोगो बोर्डले वैशाख २५ गते उत्कृष्ट घोषणा गरेको थियो ।
पर्यटन बोर्डले उत्कृष्ट लोगोका लागि १ लाख रुपैयाँ पुरस्कार तोकिएको थियो । सरकारले सन् २०२० मा २० लाख पर्यटक भित्र्याउने लक्ष्यसहित ‘नेपाल भ्रमण वर्ष सन् २०२०’ को घोषण गरेको हो ।
सरकारले मनाउन लागेको यो तेस्रो भ्रमण वर्ष हो । यसअघि सन् १९९८ मा पाँच लाख पर्यटक भित्र्याउने लक्ष्यसहित भिजिट ‘नेपाल –९८’ र २०११ मा १० लाख पर्यटक भित्र्र्याउने लक्ष्य सहित ’नेपाल टुरिजम इयर’ मनाइएको थियो ।
