२३ साउन, काठमाडौँ।
परराष्ट्रमन्त्री डा. आरजु राणा देउवाले भारतको उत्तराखण्डको बाढीमा हराएका नेपाली नागरिकको खोजी एवं उद्धारका लागि कूटनीतिक पहल भएको बताएकी छन् ।
दिल्लीस्थित नेपाली दूतावासमार्फत यो पहल अघि बढेको उनको भनाइ छ । ‘हराएका नेपाली नागरिकहरुको खोजी तथा उद्दारका लागि भारत सरकारको समन्वयमा तदारूकताका साथ लाग्न नयाँ दिल्लीस्थित नेपाली दूतावासलाई निर्देशन दिएकी छु’, मन्त्री राणाले सामाजिक सञ्जालमा उल्लेख गरेकी छन् ।
यही बुधबार (२० साउन)मा उत्तराखण्डको उत्तरकाशी जिल्लाको धराली गाउँमा अचानक आएको बाढी र पहिरोले ठूलो जनधनको क्षति पु-याएको छ । खोज तथा उद्दार कार्य जारी रहँदा कम्तिमा २२ नेपाली सम्पर्कविहीन भएका प्रारम्भिक विवरण छ ।
स्थानीय समय अनुसार भीषण वर्षापछि मंगलबार दिउँसो साढे १ बजे लेदोसहित ठूलो बाढी आएको थियो ।
सो घटनामा जाजरकोटका १३, धादिङका ४, बर्दियाका ४ र जुम्लाका १ जना नेपाली सम्पर्कविहीन छन् । बेपत्ता नेपालीहरूको खोजीका लागि भारतीय पक्षसँग समन्वय भइरहेको दिल्लीस्थित नेपाली दूतावासले जनाएको छ ।
