२७ माघ, काठमाडौं
वन तथा वातावरणमन्त्री ऐनबहादुर शाही ठकुरीले जलवायु परिवर्तनको असर सामना गर्न नेपालजस्ता विकासोन्मुख देशहरूका लागि प्रर्याप्त वित्तीय स्रोतहरूको खाँचो औल्याएका छन् ।
नेपालमा पुनरूत्थानशील बागवानी मूल्य श्रृंखला सम्बन्धी कार्यक्रममा उनले नेपाल जलवायु परिवर्तनको उच्च जोखिममा रहेको उल्लेख गर्दै विकासोन्मुख देशहरूका लागि यस्तो धारणा राखेका हुन् ।
‘नेपाल जलवायु परिवर्तनको उच्च जोखिममा रहेको कुरा हामी सबैलाई सर्वविदिततै छ । विश्वले जलवायु परिवर्तनको मुख्य कारक मानेको कार्बन उत्सर्जनलाई घटाउनुको साथै हामी जस्ता विकासोन्मुख देशहरूका लागि प्रर्याप्त वित्तीय स्रोतहरू उपलब्ध गराउन अत्यन्तै आवश्यक छ’, मन्त्री शाहीले भने ।
उनले जलवायुमैत्री कृषि, नविकरणीय ऊर्जा र दिगो वन व्यवस्थापनमा लगानी वृद्धि गर्न विभिन्न कदम चालिरहेको पनि बताए । नेपाललाई जलवायु परिवर्तनको प्रभावबाट जोगाउन प्रभावकारी उपायहरू मध्ये पुर्नउत्पादक बागवानी एक महत्वपूर्ण उपाय रहेको मन्त्री शाहीले धारणा राखे ।
