११ पुस, मकवानपुर
गैंडाको खाग तस्करलाई पक्राउ गर्न नेपाली सेनाको टोलीले हवाई फायर गरेको छ ।
५ राउण्ड हवाई फायर गरेर हेटौंडा–५ गर्दोई र हेटौंडा–८ को सीमा क्षेत्रबाट खाग तस्कर कार्यमा संलग्न रहेका एक जनालाई सेनाले नियन्त्रणमा लिएको हो ।
चितवन राष्ट्रिय निकुञ्जको सुरक्षार्थ खटिएको सेनाको टोलीले आज बिहान ११ बजे आसपासको समयमा एक पुरूषलाई गैंडाको खागसहित नियन्त्रणमा लिएको जिल्ला प्रहरी कार्यालय मकवानपुरले पुष्टि गरेको छ ।
विशेष सुराकीका आधारमा तस्करलाई नियन्त्रणमा लिन २ वटा भ्यानसहित सेनाको टोली सादा पोशाकमा परिचालन भएको थियो । खाग तस्कर भाग्न खोजेपछि हवाई फायर भएको प्रहरीले जनाएको छ ।
यसबारे थप अनुसन्धान गरेर चितवन निकुञ्जले विस्तृत विवरण र पक्राउ परेका व्यक्ति सार्वजनिक गर्ने भएको छ ।
