१३ भदौ, काठमाडौं
जंगली बँदेल मारेको आरोपमा पूर्व प्रहरी नायब महानिरीक्षक (डिआइजी), बहालवाला प्रहरी नायब निरीक्षक (सई)लगायत अन्यलाई नियन्त्रणमा लिएर प्रहरीले छानबिन अघि बढाएको छ ।
पूर्व डिआइजी ज्ञानविक्रम शाहसहित १० जनामाथि प्रहरीले अनुसन्धान गरेको हो । शाह लगायतको टोलीले सप्तरीको हनुमाननगर कंकालिनी नगरपालिका–१ भारदह योगिनायाँ कोशी पलार क्षेत्रमा जंगली बँदेल मारेको आरोप छ । बहालवाला सई विराटनगरका सञ्जय न्यौपाने हुन् ।उनीहरूलाई सप्तरी प्रहरीले आज विहान ३ बजे आसपासमा निन्त्रणमा लिएको हो ।
सप्तरी प्रहरी नायव उपरीक्षक (डिएसपी) ढुण्डीराज न्यौपानेले घटनाको छाविन भइरहेको बताए । प्रहरीले उनीहरूको साथबाट एउटा २२ क्यालीबरको राइफल २ म्यागजिन, १५ राउण्ड गोली, ३ वटा वाइनाकुलर, एउटा ट्राइपोर्ट, एउटा फलामको हथौडा र एउटा खुर्पा बरामद गरेको छ । साथै, मारिएको बँदेल लोड गरिएको को २ त ६९ नम्बरको ट्रयाक्टर र प्र ३ – ०१– ०२२ च ६८५५ नम्बरको स्कारपियो समेत प्रहरी नियन्त्रणमा छ ।
सरकारले गत वर्षको ७ मङ्सिरमा बँदेललाई हानिकारक वन्यजन्तु घोषणा गरेको छ । बँदेलले किसानको खेतबारीमा बालीनाली वा अन्य धनजनको हानि–नोक्सानी पु¥याएमा किसान एक्लै वा सामूहिक रूपमा त्यस्तो बँदेललाई धपाउन, लखेट्न वा मार्न पनि पाउने व्यवस्था छ ।
पुड्के बँदेल (सानो बँदेल) बाहेक अन्यको हकमा मार्न सकिने प्रावधान छ । तर, सोझै शिकार गर्ने नियतले मारेको पाइएमा प्रहरी र वन कार्यालयले अनुसन्धान अघि बढाउन सक्ने छन् ।
सप्तरीमा प्रहरी नियन्त्रण रहेकाहरूले खेतबारीमा बाली खान आएका बेला बँदेल मारेको प्रहरीलाई बताएका छन् । जंगली बँदेललाई पक्रिएको खण्डमा सम्बन्धित वन कार्यालय, राष्ट्रिय निकुञ्ज, वन्यजन्तु आरक्षण, शिकार आरक्ष कार्यालय, संरक्षण क्षेत्र कार्यालयमा बुझाउनुपर्ने र उक्त सूचना स्थानीय वडा कार्यालयमा समेत दिनुपर्ने राजपत्रमा उल्लेख छ ।
