२३ जेठ, काठमाडौं
नेपाल वातावरण पत्रकार समूह (नेवापस)ले विश्व वातावरण दिवस (जून ५) को अवसरमा प्रदान गर्दै आएको वातावरण पत्रकारिता पुरस्कार पत्रकार वसन्तप्रताप सिंहलाई प्रदान गर्ने भएको छ ।
कान्तिपुर दैनिकका लागि बझाङबाट वातावरण र दिगो विकासका विषयमा खोजमुलक समाचार लेख्दै आएका उनलाई समूहले नगद र सम्मानपत्र प्रदान गर्ने छ । पुरस्कार समूहको आगामी साधारणसभामा हस्तान्तरण गरिने छ ।
समूहले विश्व वातावरण दिवसमा पत्रकारहरूलाई प्रोत्साहन गर्न ३ अघिदेखि वातावरण पत्रकारिता पुरस्कार प्रदान गर्दै आएको छ । गत वर्ष (सन् २०२३) भरि वातावरण र दिगो विकासका विषयमा पत्रपत्रिका, रेडियो, टेलिभिजन तथा अनलाइनमा प्रकाशित–प्रसारित सामग्री र कार्यक्रमहरूबाट सिंह सर्वोत्कृष्ट चयन भएका हुन् ।
पुरस्कारका लागि समूहले पत्रकारहरूलाई सन् २०२३ भरिका आफ्ना लेख–रचना तथा कार्यक्रम समावेश गरी आवेदन दिन आह्वान गरेको थियो । समूहका पूर्व अध्यक्ष अर्जुन ढकालको संयोजकत्वमा समूहका पूर्व महासचिव संगिता लामा र विज्ञसदस्य सरिता ज्ञवाली सम्मिलित ३ सदस्यीय निर्णायक मण्डलको सिफारिसका आधारमा सिंहलाई पुरस्कार दिने निर्णय गरिएको हो । उनी समूहको पुरस्कार प्राप्त गर्ने ३७औँ पत्रकार हुन् ।
