काठमाडौ, साउन २५ (हाकाहाकी)– काठमाडौंका तीनवटै जिल्ला प्रशासन कार्यालय आइतबारदेखि १५ दिनका लागि सर्टडाउन अर्थात अत्याबश्यक बाहेकका सेवा बन्द भएको छ ।
काठमाडौं, ललितपुर र भक्तपुर जिल्ला प्रशासन कार्यालयमा सेवाग्राहीको अत्यधिक भीड जम्मा हुन थालेपछि तीनै प्रशासन कार्यालयले यस्तो निर्णय लिइएको काठमाडौंका सहायक प्रमुख जिल्ला अधिकारी तुलसीराम पौडेलले जानकारी दिनुभएको छ ।
कोरोना तीव्र रुपमा फैलिदै गएपछि भीड बढाउन नहुने नेपाल सरकारको आदेश कार्यान्वयन गर्न १५ दिनसम्म यी तीनै कार्यालयका अत्याबश्यक बाहेकका सेवा बन्द गरीएको हो । उहाँले सरकारको निर्देशन अनुसार भीड जम्मा हुन नदिन तीनै जिल्लाका सबै कार्यालयलाई निर्देशन गरिएको बताउनुभएको छ ।
साथै यी जिल्लाका सरकारी , निजी तथा गैरसरकारी कार्यालयले पनि सामाजिक दुरी कायम गरी स्वास्थ्य मापदण्ड पालना गनुपर्ने , यदि यसो नभएमा कारबाहि गर्ने जनाइएको छ ।
साथै बिभिन्न व्यापारीक केन्द्र , पसल ,ब्यवसाय , होटल , रेष्टुरा ,ब्युर्टि पार्लर सञ्चालन गर्दा सामाजिक .दुरी कायम गरी स्वास्थ्य मापदण्ड पालना गर्न पनि अपिल गरीएको छ । सबै सवारीसाधन भने जोर बिजोर प्रणाली नै लागु हुने पनि सहायक प्रजिअ पौडेलले बताउनुभयो ।
यसैगरी वाणिज्य, आपूर्ति तथा उपभोक्ता संरक्षण विभागले आजदेखि १५ दिनसम्म अत्यावश्यक सेवामात्र प्रवाह गर्ने भएको छ ।
काठमाण्डौ उपत्यकामा कोभिड(१९ को जोखिम बढेको भन्दै विभागले आजदेखि केही सेवा अनलाइनबाटै लिन सकिने व्यवस्था गरे पनि कार्यालयमा भीडभाड बढेपछि अत्यावश्यकबाहेकका सेवा केही दिनका लागि स्थगन गरेको हो । तत्कालका लागि विभागले नयाँ निजी र साझेदारी फर्म दर्ता, अत्यावश्यक वस्तु आयात गर्नेबाहेक अरु व्यापारमुलक प्रकृति भएका प्राइभेट लिमिटेड (प्रालि)को इजाजतसम्बन्धी सेवा स्थगित गरिएको जनाएको छ । यस्तै निजी र साझेदारी फर्म नवीकरण, संशोधन र खारेजी तथा एजेन्सी नवीकरणका काम दैनिक बढीमा २० र २० वटा गरिनेछ ।
यो अवधिमा बजार अनुगमन, आयातरनिर्यात अनुमति तथा इजाजत र मुद्दासम्बन्धी काम भने नियमित सञ्चालन हुने विभागले जनाएको छ । विभागले अत्यावश्यक सेवा लिन आउँदा अनिवार्य मास्क लगाउन र व्यक्तिगत दूरी कायम गर्न पनि सेवाग्राहीसँग आग्रह गरेको छ ।
