काठमडौ, जेठ १४ (हाकाहाकी)– पाकिस्तानमा कोरोनाभाइरस संक्रमितको संख्या बढ्दै गएको छ ।
सिन्ह्वा समाचार अनुसार पाकिस्तानमा संक्रमितको संख्या ५९ हजार १५१ पुगेको छ । विगत २४ घण्टामा पाकिस्तानमा १ हजार ४४६ संक्रमित थपिएको बताइएको छ ।
पाकिस्तानमा संक्रमित मध्ये १ हजार २ सय २५ व्यक्तिको अहिलेसम्म मृत्यु भएको पनि त्यहाँका अधिकारीहरले जानकारी दिएका छन् । पाकिस्तानमा हिजो मात्रै २८ जना संक्रमितको ज्यान गएको छ ।
पाकिस्तानी समाचार संस्था जिओ न्यूजले सबैभन्दा बढी प्रभावित पाकिस्तानको सिन्ध राज्यमा रहेको बताएको छ ।
त्यसपछि कोरोना भाइरस संक्रमित राज्यमा पञ्जाव, खैबर पाख्तुनख्वा,बालोचिस्तान, गिलगित बाल्टिस्तान, इस्लामावाद र पाकिस्तान प्रशासित काश्मिरमा रहेका छन् । संक्रमितहरुमध्ये १९ हजार १२४ जना व्यक्ति उपचारपछि निको भएर घर फर्किएका पनि प्राप्त समाचारमा जनाइएको छ । अधिकारीहरुले त्यहाँका विभिन्न अस्पतालमा ३८ हजार ७८४ जना संक्रमितले उपचार गराइरहेको जनाएका छन् ।
