काठमाडौ, जेठ ५ (हाकाहाकी)– आफुलाई कोरोना भाइरसको संक्रमण भए–नभएको थाहा पाउन ४२ हजारले अनलाइन फारम भरेका छन् ।
अनलाइन फारममा विभिन्न प्रश्नहरू सोधेर उत्तरको आधारमा संक्रमणको संभावनाका आधारमा व्यक्तिहरू छुट्याइन्छ ।
सरकारको आधिकारिक वेबसाइट कोभिडनाइन्टिन एमओएचगोभएनपी र हाम्रो स्वास्थ्य एपमार्फत ४२ हजार एक सय ६७ ले फारम भरेका हुन् ।
गएको २४ घन्टामा मात्रै तीन हजार ९९ जनाले फारम भरेको स्वास्थ्य मन्त्रालयले जनाएको छ । ती मध्ये २३ जना सम्भावित संक्रमित छन् ।
योसँगै अनलाइनमार्फत फारम भरेकामा रेड जोन अर्थात् संक्रमणको सम्भावना रहेका मानिसको संख्या चार सय पाँच पुगेको मन्त्रालयले जनाएको छ ।
अनलाइन फारम चैत मसान्तसम्ममा १५ हजार ७० जनाले भरेका थिए । तीमध्ये दुई सय ६ जना रेड जोनमा परेका थिए ।
वैशाख मसान्तसम्ममा अनलाइन फारम भर्नेको संख्या ३५ हजार सात सय २३ पुगेको थियो भने तीन सय ५४ जना रेड जोनमा परेका थिए ।
सोमबारसम्म आइपुग्दा करिब १ हप्ताभन्दा कम समयमा झन्डै सात हजारले अनलाइन फारम भरेका छन् ।
यदि कुनै व्यक्ति विदेशबाट आएको, संक्रमितलाई भेटेको वा संक्रमितको सम्पर्कमा आएको एवं लक्षणहरू देखिएको छ भने ती व्यक्तिलाई रेड जोनमा राखिन्छ ।
