काठमाडौ, बैशाख २३ (हाकाहाकी)– चिकित्सक तथा विज्ञहरुले कोरोनाको नूमना परीक्षण पिसिआर विधिबाट गर्न सरकारलाई बारम्बार सुझाव दिइरहेको भएतापनि सरकारले अहिले १३ हजार ८ सय ५० जनामा मात्र यो विधिबाट परीक्षण गरेको छ ।
जबकी कम विश्वासिलो मानिएको आरडिटी विधिबाट भएको परीक्षणको संख्या ५२ हजार २ सय २७ छ ।
यी दुवै विधि गरी सरकारले हालसम्म ६६ हजार ७७ वटा नमूना परीक्षण गरेको छ । स्वास्थ्य तथा जनसङ्ख्या मन्त्रालयमा आज आयोजित नियमति पत्रकार सम्मेलनमा प्रवक्ता डा. विकास देवकोटाले पिसिआर विधिबाट १३ हजार ८५० र आरडिटी विधिबाट ५२ हजार २२७ नमूना परीक्षण गरिएको जानकारी दिनुभएको हो ।
मुलुकभरका विभिन्न १८ स्थानबाट पिसिआर विधिबाट परीक्षण भइरहेको उहाँले जानकारी दिनुभयो । देशभर कुल सङ्क्रमितको सङ्ख्या ८२ पुगेको छ । जसमध्ये पुरुष ६२ र महिला २१ छन् ।
प्रदेश नं १ मा ३१, प्रदेश नं २ मा १३, वाग्मती प्रदेशमा सात, गण्डकी प्रदेशमा दुई, प्रदेश नं ५ मा २४ र सुदूरपश्चिम प्रदेशमा पाँच जनामा सङ्क्रमण देखिएको छ । रुपन्देहीमा एक, नेपालगन्जमा २३, कैलालीमा एक, चितवनमा एक, पर्सामा नौ र मोरङमा ३१ जना गरी जम्मा ६६ जनाको उपचार भइरहेको छ ।
सबै सङ्क्रमितको स्वास्थ्य अवस्था सामान्य रहेको प्रवक्ता देवकोटाले जानकारी दिनुभयो । आइसोलेसनमा रहेका सम्भावित सङ्क्रमितको सङ्ख्या १२० रहेको छ । काठमाडौँ उपत्यकामा २ र उपत्यका बाहिर ११८ जना आइसोलेसनमा छन् । मुलुकभर क्वारेन्टिनमा बस्नेको सङ्ख्या २१ हजार ९९ पुगेको छ ।
यसैबीच, नेपालमा सबैभन्दा बढी प्रदेश नम्बर १ कोरोना सङ्क्रमणबाट प्रभावित भएको छ । कर्णाली प्रदेशमा अहिलेसम्म सङ्क्रमण देखिएको छैन ।
