काठमाडौ, बैशाख २२ (हाकाहाकी)– स्वास्थ्य तथा जनसंख्या मन्त्रालयले शरीरमा कीटनाशक पदार्थ छर्कदैँमा कोरोना भाइरस निको नहुने तर त्यसले स्वास्थ्यमा असर गर्ने जनाएको छ ।
देशका विभिन्न स्थानमा कीटनाशक झोलहरु शरिरमा छर्कने गरिएका खबर तथा तस्बिरहरु सार्वजनिक भइरहेका बेला मन्त्रालयका प्रवक्ता डा. विकास देवकोटाले यस्ता किटनाशक झोलमा पानीमा मिसाइएको सोडियम हाइड्रोक्लोराईड र क्लोरिनको झोल हुने भएकाले त्यसले शरिरमा हानी पुर्याउने बताउनुभयो ।
यस्ता डिसइन्फेक्टहरु सही तरिकाले उपयोग नगर्दा श्वासप्रश्वास सम्बन्धी बिभिन्न समस्याहरु पनि उत्पन्न भएको विभिन्न अध्ययनहरुले देखाएको प्रवक्ता डा. देवकोटाले बताउनुभएको छ ।
तर तोकिएको मापदण्डहरु पूरा गरेर सही तरिकाले सही मात्रामा कीटनाशक छर्कँदा भुई र सतहहरुलाई भने निसंक्रमण गर्न मद्दत पुग्ने उहाँले बताउनुभएको छ ।
उहाँले बिभिन्न सवारी साधनहरु, बिभिन्न बस्तुहरु, प्याकिङ गरिएका सामग्री आदिमा स्प्रे गरेर ती वस्तुका सतहलाई निसंक्रमण गर्न सकिने बताउनुभयो ।
कोभिड १९ बाट जोगिने सबैभन्दा सरल र महत्वपूर्ण उपाय २० सकेन्डसम्म मिचिमिची साबुन पानीले हात धुने र लकडाउनको पालना गरेर सामाजिक दूरी कायम गरेर यो भाइरसबाट जोगिन सक्ने प्रवक्ता डा. देवकोटाले बताउनुभयो ।
