काठमाडौ, बैशाख १९ (हाकाहाकी)— ट्रेड युनियन महासंघ नेपाल (टुकोन)ले श्रमिकका समस्या समाधान गरिदिन सरकारसँग आग्रह गरेको छ ।
आज एक विज्ञप्ति जारी गर्दै टुकोनले कोरोनाको बहानामा उद्योग, प्रतिष्ठान, होटल, रेष्टुरेन्ट, यातायातलगायतका क्षेत्रका श्रमिकहरुलाई रोजगारीबाट निकालिएको भन्दैे लकडाउन अवधिको पारिश्रमिक दिन आग्रह गरेको हो ।
यो समस्याको दीर्घकालीन समाधानका लागि सरकार, व्यवसायी र महासंघ सम्मिलित त्रिपक्षीय बैठक बस्न पनि टुकोनले माग गरेको छ ।
टुकोनले श्रमिकहरुको निस्शुल्क स्वास्थ्य जाँच गर्नुपर्ने, श्रमिकहरुलाई तत्कालका लागि स्थानीय तहमै रोजगारीको प्रबन्ध मिलाउनु पर्ने, दैनिक काम खाने श्रमिकलाई खाद्यान्न उपलब्ध गराउनु पर्ने माग गरेको छ ।
साथै लकडाउनलाई खुकुलो बनाएर महामारीको अवधिभर अत्यावश्यक क्षेत्रमा काम गर्ने श्रमिकलाई उद्योग, प्रतिष्ठानभित्रै क्वारेन्टाइनमा राखी सुरक्षित काम गर्ने वातावरण बनाइ अतिरिक्ता भत्ताको व्यवस्था गर्न पनि टुकोनले माग गरेको हो ।
