चैत ३० (हाकाहाकी)– विरगंजमा थप तीन जनामा कोरोना भाइरस संक्रमण भेटिएपछि स्वास्थ्य तथा जनसंख्या मन्त्रालयले क्वारेन्टाइनमा राख्ने र परीक्षणको दायरा बढाउने आफ्नो रणनीतिलाई अझ तीव्र रूपले अघि बढाउने भएको छ ।
मन्त्रालयले नियमित आयोजना गर्ने पत्रकार सम्मेलनमा प्रवक्ता डा. विकास देवकोटाले संक्रमितको संख्या थप भएपछि रणनीति अपनाएर अघि बढ्ने बताउनुभयो ।
उहाँले थप तीन जनामा संक्रमण भेटिएको र अब अझै चनाखो हुनुपर्ने देखिएको बताउँदै मन्त्रालयले लकडाउन पूर्ण पालना गराउँदै क्वारेन्टाइनमा राख्ने र परीक्षणको दायरा बढाउने नीति अघि सारेको समेत जानकारी गराउनुभयो । होम क्वारेन्टाइन वा सरकारी निकायले बनाएका क्वारेन्टाइनमा बसेर लकडाउनको सबैले पूर्ण पालना गर्ने हो भने संक्रमण बढ्ने जोखिम कम हुने मन्त्रालयले विश्वास लिएको छ ।
मन्त्रालयले सबैलाई घर(घरमा बसेर सहयोग गरिदिन अनुरोधसमेत गरेको छ ।
मन्त्रालयले नयाँ केस भेटिएसँगै नेपालमा अब संक्रमितको संख्या १२ पुगेको जनाएको छ ।
नेपालमा आजसम्म पाँच हजार १८४ जनाको थ्रोट स्वाबको नमूना लिएर परीक्षण गरिएको छ भने तीन हजार ३२१ जनाको आरडीटी विधिबाट परीक्षण गरिसकिएको छ ।
मन्त्रालयले परीक्षणको दायरा उपत्यका भन्दा बाहिर पनि धेरै स्थानमा अघि बढाइसकिएको जनाएको छ । अहिले दैनिक ८०० नमूना परीक्षण भइरहेका छन् । तथ्यांक अनुसार नेपालभर बनाइएका क्वारेन्टाइनमा अझै मानिस बसेका छैनन्। सात हजार ९७३ जना मात्रै अहिलेसम्म क्वारेन्टाइनमा बसिरहेको मन्त्रालयको तथ्यांकमा उल्लेख छ । देशैभर ३० हजार ५६६ जनालाई राख्न मिल्ने क्वारेन्टाइन बनाइएका छन्।
