काठमाडौं–विभिन्न विपद्का घटनामा परी नेपालमा दुई दिनमा ११ जनाले ज्यान गुमाएका छन्।
गृह मन्त्रालय अन्तर्गतको राष्ट्रिय आपतकालीन कार्य सञ्चालन केन्द्रका अनुसार ११ र १२ साउनमा विपद्का घटनाबाट देशभरका विभिन्न १० जिल्लामा मानवीय क्षति भएको हो।
विपद्बाट काठमाडौंं, दाङ, बाँके, दोलखा, बाग्लुङ्ग, बारा, सप्तरी, रौतहट र नवलपरासी पश्चिममा एक–एक जना तथा मोरङमा दुई जनाले ज्यान गुमाएको केन्द्रले जनाएको छ। उनीहरूको खोलामा डुबी, खोलाले बगाइ, पोखरीमा डुबेर र चट्याङ लागेर मृत्यु भएको हो।
वैशाखदेखि साउन ११ सम्म ४ सय ४३ जनाको मृत्यु
गृह मन्त्रालले वैशाख १ देखि साउन ११ गतेसम्म बाढीपहिरो लगायतका प्राकृतिक प्रकोपमा परी ४ सय ४३ जनाले ज्यान गुमाएको जनाएको छ।
राष्ट्रिय आपतकानीन सञ्चालन केन्द्रले देशभरका विभिन्न जिल्लामा आएको बाढीपहिरो, आगलागी, चट्याङ, हावाहुरी, भारी वर्षा, हिमपात लगायतका प्राकृतिक प्रकोपमा परी ३ सय २ जना पुरुष र १ सय ४१ जना महिलाको मृत्यु भएको जनाएको छ। ७२ जना बेपता छन्।
यो अवधिमा डुबेर २ सय ६५ जना, डुंगा डुबेर १ जना, आगलागीमा परी १० जना, बाढी २७ जना र पहिरोमा परी ४३ जनाको मृत्यु भएको छ।
त्यसैगरी भारी वर्षामा परी ७ जना, हावाहुरी १४ जना, हिमपात १ जना, चट्याङमा ३९ जना, हाइ अल्टिटुउड १२ र अन्य विपद्का घटनमा परी २४ ले ज्यान गुुमाएका छन्।