काठमाडौं– काठमाडौंका प्रायः उपभोक्ता जारको पानी खान्छन् । धारामा आउने पानी ‘अशुद्ध’ रहने भन्दै उपभोक्ता जारको पानी खाने गर्छन् । कतिपय उपभोक्ता धाराको पानी उमालेर खान्छन्
जारको पानीमा समेत मानव स्वास्थ्यमा असर गर्ने आइरन, कोलिफर्म जस्ता जीवाणु भेटिएको यसअघिका घटनाले पुष्टि गरेको छ।
बोतल र जारको पानीको गुणस्तर कायम गर्न भन्दै सरकारले निश्चित मापदण्ड बनाएको छ । हानिकारक जीवाणु शून्य हुनुपर्ने तथा अम्लियपनको मात्रा पीएच स्केलमा ६ दशमलव ५ देखि ८ सम्म हुनुपर्ने भनिएको छ । तर, सरकारी तवरबाट अनुगमन तथा कानून कार्यान्वयको पक्ष फितलो देखिएको छ । प्रशोधित पानी भनेर लेखिएका जारको पानी खान योग्य छैनन्।
दूषित जारको पानीबारे जानकारी नभएर होइन विकल्प नहुँदा जारको पानी खान बाध्य छन्, उपभोक्ता । प्रशोधित भनिएका जारको पानीबारे के भन्छन् उपत्यकाका उपभोक्ता ? हाकाहाकीले केही स्थानीयसँग कुराकानी गरेको छ । उनीहरूको विचार जस्ताको त्यस्तै :
खान योग्य छैन भन्ने त थाहा छ तर खानुपर्ने बाध्यता : सुनिता विसुङखी (२५)
हामी डेरा गरी बस्नेहरूका लागि जारको पानी खानुपर्ने बाध्यता नै हो। जारको पानी दूषित छ भन्ने समाचार सुनिरहेका छौं तर, जारको पानी नखानुको अरू विकल्प पनि त छैन ।
पानी उत्पादन गर्न बिक्री गर्ने तर, मानव स्वास्थ्यमा असर पार्न पदार्थ मिसावट गर्न उद्योगीहरूलाई कारबाही किन नभएको होला ? उद्योगीहरूले हामी उपभोक्ताको स्वास्थ्यका बारेमा पनि सोच्नु आवश्यक छ ।
पैसा कमाउने नाममा उपभोक्तालाई मार्नु त भएन नि । कसले सोच्छ हाम्रो बारेमा । हामी उपभोक्ता आफंै सचेत हुनुपर्छ जस्तो लाग्छ । अविश्वास भएता पनि जारको पानीलाई फिल्टर गरेर र उमालेर खाने गरेकी छु ।
९५ प्रतिशत जारको पानी दूषित छ :पभव बानियाँ (२५)
प्रशोधित जारको पानी खादा मेरा धेरै साथीहरू बिरामी परेका छन् । ढुक्क भएर जारको पानी खानसक्ने अवस्था छैन । काठमाडौं उपत्यकामा बिक्रीवितरण हुने ५ प्रतिशत जारको पानी मात्र खान योग्य छ, जस्तो लाग्छ । बाँकी ९५ प्रतिशत जारको पानी दूषित छ ।
हामीले शुद्ध र स्वच्छ खानेपानी खान त पाएका छैनौं तर खानुपर्ने बाध्यता छ । खानैपर्छ, हामीसँग अरू विकल्प नै छैन । मैले जारको पानी खादा उमाले र पिउस हालेर मात्र खाने गरेको छु ।
यहाँ पानीको अति अभाव छ । बजारमा पाइने जारको पानी कुन स्वच्छ छ, कुन दूषित हामी उपभोक्ताले कसरी जाँच गर्ने । यो त सरकारको काम होइन र ?
जारको पानीमा किरा भेटेकी छु : भगवती शाह(४५)
प्रशोधित जारको पानी खान योग्य छ भनेर ढुक्क भएर खान सकिने अवस्था छैन । मैले किनेर ल्याएको जारको पानीमा एक पटक किरा भेटेकी छु ।
जारको पानी किन्दा कुन उद्योगले उत्पादन गरेको होे नहेरी किन्छु । जारको बाहिर भाग पनि सफा देखिदैन, फोहोर देखिन्छ ।
किन्न मन त लाग्दैन तर, के गर्नु पानी नखाइ बाच्न ग्राहो खाएपछि बिरामी भैइन्छ भन्ने पिरलो ।
दूषित पानी उत्पादन गरि विक्रीवितरण गर्न उद्योगहरूलाई सरकारले कारबाही किन गर्दैन?
जारको पानी स्वच्छ छ भनेर ढुक्क छैन : देवेन्द्र बम (२७)
जारको पानी स्वच्छ हुन्छ भनेर खाने गर्छाैं । तर, जारको पानीमा समेत विभिन्न जीवाणु भेटिएको खबर बेलाबेलामा सार्वजनिक हुन थालेपछि स्वच्छ र सफा पानी नै प्रयोग गरिरहेका छौं भनेर ढुक्क छैन ।
काठमाडौंमा पानीको समस्या छ । धाराको पानी झनै दुषित हुने भएकाले जारको पानीको भर नपरी हुँदैन। चिकित्सकहरूले पानी उमालेर खान सल्लाह दिन्छन् ।
तर, त्यो सम्भव रहँदैन । किनकी घर बाहिर, जुनसुकै बेला उमालेको पानी उपलब्ध हुँदैन । त्यसैले हामीलाई अति आवश्यक पर्ने पानीको शुद्धताका लागि सरकारले ध्यान दिन जरूरी छ।
स्वच्छ छ भनेर नै किनिन्छ :सर्मिला पौडेल (२७)
जारको पानी सफा र स्वच्छ हुन्छ भनेर नै पिउने गरिएको छ । बाहिरबाट हेर्दा सफा, स्वच्छ नै देखिन्छ त्यसभित्र के कस्ता जीवाणु छन् भन्ने हामीलाई थाहा हुँदैन ।
त्यहि पनि जीवाणु मर्छ भनेर घरमा उमालेर खाने गरेका छौं । तर बाहिर त्यो सम्भव हुँदैन । सिधैँ जारको पानी खाइन्छ ।
