काठमाडौं–रुसमा जारी २१ औँ संस्करणको विश्वकप फुटबलमा क्बार्टरफाइनलका खेलहरु चलिरहदा विभिन्न देशमाथि समर्थन र विरोध भइरहेको छ । आफुलाई मनपर्ने टोली जित्दा खुसी र मनपर्ने टोली हार्दा दुखी हुने परिपाटि अन्य स्थानमा झैँ नेपालमा पनि देखिएको छ । तर केही स्थानमा रातीको समयमा फुटबल समर्थकहरु विश्वकप फुटबल हेर्दा निस्किएको फोहोरमैलालाई ब्यवस्थापन गर्न पनि लागिपरेका छन् । ‘फुटबल जति महत्वपूर्ण छ , त्यत्ति नै हाम्रा लागि वातावरण पनि महत्वपूर्ण छ ’, ललितपुर गोदावरी नगरपालिका वडा नम्बर १० का युवाहरु भन्छन् , ‘विश्वकपको मनोरञ्जनले हाम्रो गाउँ–समाजलाई धुमिल पार्ने होइन, बरु स्वच्छ वातावरणको उदाहरण दिँदै फुटबलको विकास गर्ने हो ।’
वडा नम्बर १० मा रहेको न्यौपानेगाउँको स्थानीय जागरण युवा क्लबले विश्वकप सुरु भएदेखि नै प्रोजेक्टर मार्फत विश्वकप फुटबल गाउँभरिका फुटबलप्रेमिलाई समेट्ने गरि देखाइरहेको छ । ‘शनिबारको दिन सबै भेला भएर क्लब र क्लब बाहिरका साथीभाइ मिलेर हामीले विश्वकप हेर्ने स्थल वरपर सरसफाई ग¥यौ ’, स्थानीय रञ्जन न्यौपानेले भने , ‘ जापानले विश्वकप भएको स्थल रुसमै त सरसफाइ ग¥यो हामी आफ्नो स्थानमा सरसफाइ गर्न किन पछि पर्ने । ’ क्लबका युवाहरुले बोतल , कागज , प्लाष्टिकका खोल तथा पोखीएका तरल पदार्थलाई समेत सफा गरेर ब्यवस्थापन गरेका छन् र्। हामीले प्लाष्टिक , कागज , धुलो लगायतको ब्यवस्थापन गरेका छौं ’, सौरभले भने , ‘ खेल मात्र हेर्ने भनेर भएन सर–सफाईलाई पनि ध्यान दिनुप¥यो । ’ उनीहरुले फुटबल हेर्ने स्थान नजिकै रहेको चउरमा भएका अनावश्यक झाडी पन्छाउँदै केही समय अघि वृक्षारोपण गरेका विरुवाको गोडमेल पनि गरेका छन् ।
विश्वकप फुटबलमा राम्रो प्रर्दशन गरेको एशियाली राष्ट्र जापानले पनि क्बार्टरफाइनलमा पुग्न नसकेपनि सरसफाई गरेर आफुलाई खेलसँगै अरु पक्षमा पनि बलियो छु भनेर प्रमाणित गरिसकेको छ । जापानी समर्थकले खेलपछि आफू बसेको प्याराफिट सफा गरेका थिए ।
