काठमाडौं–चीन सरकारलाई उपहार दिने भनिएको एक जोडी गैंडाको अवस्था बुझ्न बुधबार नेपाल आएको चिनीयाँ दुर्लभ वन्यजन्तु तथा वनस्पतिको व्यापार महासन्धि (साइटिस)को टोलीले बिहीबार चितवन पुगेको छ । साइटिसका महानिर्देशक सहितको ८ सदस्यीय टोलीमा चिनीयाँ सरकारी कर्मचारी पनि छन् । साइटिसको टोलीले चितवन राष्ट्रिय निकुञ्ज पुगेर त्यहाँ रहेका १ जोडी गैँडाको स्वास्थ्य लगायत अन्य अवस्था बुझ्ने राष्ट्रिय निकुन्ज तथा वन्यजन्तु संरक्षण विभागले जनाएको छ । २ जनाको भेटरिनरीको टोली भने बिहीबार नेपाल आउने विभागले जनाएको छ । सरकारले २ जोडी गैंडा दिने बताइसकेको छ । एक जोडी यहि आर्थिक वर्षमा र अर्को जोडी अर्को आर्थिक वर्षमा दिइने विभागका उपमहानिर्देशक गोपाल भट्टराइले जानकारी दिए । ८ जनाको साइटिसको टोलीले बिहीबार दिउँसोदेखि रातीसम्म गैंडा राखीएको बुमामा पुगेर तीनीहरुकोे अवस्था बुझ्ने निकुञ्जका प्रमुख संरक्षण अधिकृत वेद कुमार ढकालले जानकारी दिए । उनका अनुसार टोली शुक्रबार काठमाण्डौं फर्किएर विभागसँग छलफल गरेर गैंडा लैजाने समयको टुङ्गो लगाउने छ । टोलीले दुई देशको सीमा , भन्सार लगायतमा पनि ध्यान दिएर अवस्था बुझ्ने उपमहानिर्देशक भट्राइले जानकारी दिए । यहि आर्थिक वर्षमा चीन पठाइने भनिएका एक जोडी गैंडाको नाम रुपसी र भद्रा हो । ‘भालेको नाम ‘भद्र ’ र पोथीको नाम ‘रुपसी’ छ । उपहार दिएको नेपाली गैंडा चीनको चिमे लाङ पार्क र सांघाई वाइल्ड एनिमल पार्कमा राखीने तयारी भएको अधिकारीहरु बताउँछन् । बोमामा राखीएका गैंडालाई काँस , दुबो , केरा , स्याउ , काउली लगायतका वस्तु खुवाएर राखीएको निकुञ्जले जनाएको छ । भालेलाई निकुञ्जको खोरियामुहान र पोथीलाई सुखिभार क्षेत्रबाट नियन्त्रणमा लिई राष्ट्रिय प्रकृति संरक्षण कोषको कार्यालय परिसरमा पिट बुमा निर्माण गरी राखिएको छ ।
विमानमा हालेर गैंडा चीन पठाउनका लागि विशेष प्रकारको खोर बनाउने काम अन्तिम चरणमा पुगेको निकुञ्जका सूचना अधिकारी नुरेन्द्र अर्यालले जानकारी दिए । गैंडालाई राखेर पठाइने चार थान खोर बनाउने काम भइरहेकोे उनले बताए । नेपालले २०६२ फागनु १६ पछि कुनै पनि देशलाई गैंडा उपहार दिएको छैन ।
साइटिस टोलीले चीन पठाइने गैंडाको जाँच गर्दै
