काठमाडौ, जेठ २५ (हाकाहाकी)– राष्ट्रपति जायर बोलसोनारोले कोरोना महामारीको नियन्त्रण गर्न नसकेको भन्दै आलोचना भएपछि ब्राजिलले सरकारी वेबसाइटबाट कोरोना संक्रमणसम्बन्धी सबै तथ्याङ्क हटाएको छ ।
ब्राजिलले अबदेखि हरेक २४ घन्टामा संक्रमित र मृत्यु भएका व्यक्तिको मात्र तथ्याङ्क सार्वजनिक गर्ने भएको छ । देशभर मृत्यु भएका कुल संक्रमित र मृतकको तथ्याङ्क सार्वजनिक गरिने छैन । राष्ट्रपति बोलसोनारोले संक्रमित र मृतकको कुल तथ्याङ्कले हालको स्थितिको चित्रण नगर्न बताउँदै आएका छन् ।
ब्राजिल हाल विश्वमै धेरै कोरोना संक्रमित भएको दोस्रो देश बनेको छ । ब्राजिलमा पछिल्लो समय दैनिक एक हजार जना भन्दा धेरैले ज्यान गुमाउँदै आएका छन् । हालसम्म ब्राजिलमा ६ लाख ७६ हजार ४ सय ९४ संक्रमित छन् भने ३६ हजार ४४ भन्दा बढीले कोरोना भाइरसका कारण ज्यान गुमाइसकेका छन् । विश्व स्वास्थ्य संगठन डब्लुएचओले दिएको लकडाउनको सुझाबलाई समेत राष्ट्रपति बोलसोनारोले अस्वीकार गरेका छन् ।
