काठमाडौ, जेठ २३ (हाकाहाकी)– सुदूरपश्चिम प्रदेशमा कोरोना परीक्षणका लागि आवश्यक पर्ने स्वाब संकलनको काम पाँच दिनका लागि स्थगित गरिने भएको छ ।
स्वाब ‘स्टोरेज’ गर्न आवश्यक पर्ने ‘डिफ्रिज’ नहुँदा पाँच दिनका लागि स्वाब संकलनको काम नगर्न सुदूरपश्चिम प्रदेश स्वास्थ्य निर्देशनालयले ९ ओटै जिल्लाका स्वास्थ्य कार्यालयहरुलाई निर्देशन दिएको हो ।
सुदूरपश्चिममा रहेको एकमात्र प्रयोगशालामा शुक्रबारसम्म ११०० स्वाब संकलन गरिएको छ । दैनिक २५० जनाको ‘पीसीआर’ परीक्षण भइरहेको छ ।
प्रयोगशालामा तत्काल थप स्वाब राख्न नसकिने भन्दै पाँच दिनका लागि संकलनको काम रोक्न भनिएको निर्देशनालयका निर्देशक डा. गुणराज अवस्थीले जानकारी दिनुभयो ।
उहाँले प्रयोगशालामा ११०० भन्दा बढी स्वाब राख्न सकिने अवस्था नभएकाले पाँच दिनसम्म संकलन गर्ने काम रोक्ने निर्णय भएको बताउनुभयो।
