काठमाडौँ– जलवायु परिवर्तनसम्बन्धी संयुक्त राष्ट्रसंघ संरचना महासन्धिको पक्ष राष्ट्रको सम्मेलन (कोप)मा १६ वर्षिया बालिका ग्रेटा थनवर्गले मानिसहरूबाट परिर्वतन सम्भव रहेको बताएकी छन् ।
स्पेनको राजधानी म्याड्रिडमा जारी कोप–२५ लाई सम्बोधन गर्दै सरकारबाट केही परिर्वतन नहुने भन्दै मानिसले सो काम गर्न सक्नेमा आफू आशाबादी रहेको थनवर्गले बताएकी हुन् ।
उनले भनिन्, ‘म भन्दै छु आशा अझै छ । मैले देखेको छु । तर त्यो सरकारबाट आउँदैन । त्यो नागरिकबाट आउँछ । जो मानिसहरू अनविज्ञ थिए उनीहरूमा जागरूकता आएको छ । हामी एकपटक जागरूक भयौं भने हामी परिर्वतन गर्न सक्छौं । मानिसहरू पनि परिर्वतन गर्न सक्छन् । परिर्वतनको लागि उनीहरू तयार छन् ।’
प्रजातन्त्र भएका कारण पनि आशावादी हुन सक्ने भन्दै उनले भनिन्, ‘प्रजातन्त्रका कारण पनि हामी आशावादी हुन सक्छौं । प्रजातन्त्र हरेक समय हुन्छ । निर्वाचनको दिन मात्र होइन लोकतन्त्र हरेक सेकेण्ड र हरेक घण्टा हुन्छ । यो सर्वसाधारणको विचार हो जसले स्वत्रन्त संसार चलाउँछ । हामी इतिहास हेर्न हो भने पनि विश्वमा ठूलाठूला परिर्वतन जनताको कारण भएको छ । हामीले पर्खनु पर्दैन् । परिर्वतन हामी आजैबाट शुरु गर्न सक्छौं । हामी मानिसहरूबाट ।’
गत एक वर्षदेखि जलवायु परिवर्तनको असर कम गर्नका लागि तत्काल केही कदम लिन विश्वकै ध्यानाकर्षण गराउँदै आएकी ग्रेटाको चर्चा संसारभर छ ।
जलवायु परिवर्तनको लागि प्रत्येक शुक्रबार विद्यालय बहिष्कार सडकमा आवाज उठाउने उनको अभियानले विश्वव्यापी रुपमा चलिरहेको छ ।
विशेषत जलवायु परिवर्तनको असर कम गर्नका लागि राजनीतिक तहबाट कुनै पनि सक्रिय पहल नभएको भन्दै उनले हरेक शुक्रबार विद्यालयमा हड्ताल गर्ने अभियान शुरु गरेकी हुन् ।
यसअघिको न्यूयोर्कमा भएको जलवायु परिवर्तन सम्वन्धी राष्ट्रसंघिय सम्मेलनमा ग्रेटाल गर्दै विश्वका नेतालाई वातावरण जोगाउन तत्काल कदम चाल्न आग्रह गरेकी थिइन् ।
