बाढीपहिरोका कारण मृत्यु हुनेको संख्या ७८ पुग्यो (नामावलीसहित)

काठमाडौँ– अविरल वर्षाको कारण शुक्रबारदेखि देशका विभिन्न स्थानमा आएको बाढी, पहिरो र डुबानमा परी मंगलबार साढे १२ बजेसम्म ७८ जनाको मृत्यु भएको छ।

बाढी पहिरोमा परेका ३ हजार ३ सय ६६ जनाको सकुशल उद्धार गरी सुरक्षित स्थानमा स्थानान्तरण गरिएको विपद् पूर्व तयारी तथा प्रतिकार्य शाखाकी शाखा अधिकृत रमा घिमिरेले जानकारी दिएकी हुन्।

बाढी पहिरोमा परी ३२ जना वेपत्ता भएका छन्। वेपत्ताको खोजी कार्य जारी छ। साथै ४० जना घाइते भएका छन्। घाइतेहरूको स्थानीय अस्पतालमा उपचार भइरहेको छ।

मानवीय क्षतिको विवरण:

साथै स्थानीय प्रशासन, सबै सुरक्षा निकायहरु कार्य स्थलमा उच्च सतर्कताका साथ कार्य गरिरहेको गृहमन्त्रालयले जनाएको छ। नेपाली सेना, नेपाल प्रहरी र सशस्त्र प्रहरी बल नेपाल समेतबाट ४१,२०४ जनशक्ति परिचालन गरिएको छ।

मन्त्रालयका अनुसार अवरुद्ध सडकहरु खुलाउने प्रयास भइ रहेको छ भने केही मार्गहरु खुलिसकेका छन्। अवरुद्ध विद्युत र संचार सुचारु गर्न तीब्रता दिइएको छ।

त्यसैगरी भारतीय पक्षसँग समन्वय गरी सर्लाहीमा पानी निकासा गराइएको छ। रौतहटमा पनि पानी निकासा भएको छ भने कोशी बाँधको लागि पनि निरन्तर समन्वय भइरहेको जनाकारी मन्त्रालयले दिएको छ।

आपत्‌कालीन उद्धारको लागि हेलिकप्टरहरु तत्पर अवस्थामा राखिएको जनाइएको छ। प्रदेश नं. २ मा २ वटा हेलिकप्टरहरुले राहतको कार्य गरिरहेका छन् भने प्रदेश नं. १ को ईटहरी र कर्णाली प्रदेशको सुर्खेतमा हेलिकप्टर तयारी अवस्थामा राखिएको छ।

राहत वितरणको कार्य शुरू

राहत वितरणका कार्यहरु शुरु भएको जनाएको छ। त्रिपाल, खाद्यान्न, औषधी जस्ता अत्यावस्यक सामग्री स्थानीय तह, जिल्ला विपद् व्यवस्थापन समिति, निजी क्षेत्र, रेडक्रस, मानवीय सहायतका क्षेत्रमा काम गर्ने संघ संस्थाहरूको सहभागिता रहेको छ।

प्रदेश गोदामघर हेटौडाबाट सिरहा, सर्लाही, रौतहट र महोत्तरी जिल्लाका लागि ३/३ हजार थानका दरले १२,००० पिस त्रिपाल र म्याट ४ रोल राहत सामग्री पठाइएको छ। गृह मन्त्रालयले सोमबार ललितपुर जिल्लाको गोटीखेल र गिम्दीकालागि हेलिकप्टरबाट त्रिपाल थान-४० पठाइ थप ११०० थान त्रिपाल र जेनेरेटर थान-१ तराई पठाएको हो।

यसअघि प्रदेश नं. २ को सरकारले उद्धार तथा राहतमा खर्च गर्ने गरी ८ वटै जिल्ला विपद् व्यवस्थापन समितिका लागि १० लाखका दरले उद्धार तथा राहत खर्च उपलब्ध गराउने एवं मृतक नेपाली नागरिकका परिवारलाई प्रति मृतक ३ लाखका दरले आर्थिक सहायता उपलब्ध गराउने निर्णय गरिसकेको छ।

राजमार्ग अवरुद्ध र खुलाउने प्रयास जारी
अविरल वर्षाको कारण शुक्रबारदेखि देशका विभिन्न स्थानमा आएको बाढी, पहिरोका कारण धेरैवटा राजमार्ग र सडकहरू अवरुद्ध बनेका छन् ।

उदयपुर गाईघाट-खोटाङ्ग, खोटाङ हलेसी-तुवाचुङ, महोत्तरी जनकपुर-जलेश्वर(भाप्सि खोला डाइभर्सन), सिन्धुली-मध्य पहाडी लोक मार्ग अवरोध रहेको मन्त्रालयले जनाएको छ ।

कान्ति लोकपथ-हेटौडा राजमार्गमा अवरोध रहेको छ भने कुलेखानी-फाखेल-फर्पिङ्ग सडक पहिरोका कारण अवरुद्ध बनेको छ ।

बेसिसहर मनाङ्ग, धुन्चे रसुवागढी, हेटौडा दक्षिणकाली, भालुवान प्युठान, गोरखाको बाह्रकिलो वारपाक सडक खण्ड, साघारा देखि सिरहा जाने हुलाकी राजमार्ग पनि अवरुद्ध रहेको मन्त्रालयले जनाएको छ ।

त्यसैगरी जल तथा मौसम विज्ञान विभागको बाढी पूर्वानुमान महाशाखाले आगामी ३ दिन प्रमूख नदीहरूमा बहाव सामान्य रहने जनाएको छ।

आज मंगलबार पूर्वमा कन्काई,विरिङ,निन्दा, पश्चिम राप्ती, बबई,डुडुवा, मोहना, मछेलीका शाखा नदीहरू लगायत दाङ, बाँके, वर्दिया, कञ्चनपुर, कैलाली, सर्लाही, महोतरी, झापा, मोरङ जिल्ला भई बहने केही स-साना खोलामा उच्च बहावको सम्भावना रहेकाले सतर्कता अपनाउन आग्रह गरिएको छ।