२४ जेठ, काठमाडौं
सफा हिमाल अभियान अन्तर्गत नेपाली सेनाले ३ वटा हिमालबाट ११ टन फोहर संकलन गरेको छ । सगरमाथा, ल्होत्से र नुप्त्से हिमालको सफाइबाट ११ हजार किलो फोहोर, ४ वटा शव र एउटा मानव अस्थिपञ्जर संकलन भएको हो ।
२ हजार २ सय २६ किलो फोहोर कुहिने प्रकृतिको भएकाले सो फोहोर सगरमाथा प्रदूषण नियन्त्रण समिति (एसपिसिसी) लाई बुझाइएको छ । सैनिक जनसम्पर्क निर्देशनालयका अनुसार ८ हजार ७ सय ७४ किलो नकुहिने फोहोरको व्यवस्थापन गर्न एभ्नी भेन्चर प्रालिले जिम्मा लिएको छ । शव र मानव अस्थिपञ्जर त्रिवि शिक्षण अस्पताललाई बुझाइएको निर्देशनालयले जनाएको छ ।
नेपाली सेनाले ५५ दिनको अवधिमा विभिन्न प्रकृतिको फोहोर संकलन गरेको हो । गत २९ चैतबाट सुरु भएको हिमाल सफाई अभियान बुधबार (२३ जेठमा) विश्व वातावरण दिवसको अवसर पारेर समापन भएको हो ।
सेनाले विगत ५ वर्षयता सगरमाथासहित विभिन्न हिमाल सफाई गर्दै आएको छ । यसपटक अभियानको नेतृत्व सेनानी आदित्य कार्कीले लिएका थिए । सफाइका लागि १२ जना सैनिक र एक शेर्पासहितको टोली कार्यक्षेत्रमा खटेको सेनाका प्रवक्ता एवं सहायक रथी गौरवकुमार केसीले जानकारी दिए ।
यसपटक १० हजार किलो फोहोर संकलन गर्ने लक्ष्य रहेकोमा लक्ष्य भन्दा बढी संकलन भएको बुधबार सैनिक मुख्यालयमा आयोजित कार्यक्रममा केसीले बताए । ५ वर्षको अवधिमा विभिन्न हिमालबाट १ लाख १९ हजार केजी कुहिने र नकुहिने फोहोर संकलन भएको उनले जानकारी दिए ।
नेपाली सेनाले २०३२बाट वन, वातावरण क्षेत्रको संरक्षण गर्दै आएको स्मरण गर्दै प्रधान सेनापति प्रभुराम शर्माले वातावरण संरक्षण विश्वव्यापी चुनौति भएको बताए । हिमालको संरक्षण समयमा गर्न नसक्दा त्यसको असर आगामी पुस्ताले समेत भोग्नुपर्ने बताएका उनले भने, ‘हामी सबै मिलेर हाम्रा हिमालको संरक्षण गरेनौ भने त्यसको असर वर्षाैसम्म देखिन्छ ।’
