१३ भदौ, काठमाडौँ ।
मुगुको मुगुम कार्मारोङ गाउँपालिका –१ मा ‘छायाँनाथ राष्ट्रिय निकुञ्ज’ स्थापना भएको छ । अब नेपालमा राष्ट्रिय निकुञ्जको सङ्ख्या १३ पुगेको छ ।
वन तथा वातावरण मन्त्रालयको प्रस्ताव शुक्रबार (१३ भदौमा) को मन्त्रिपरिषद् बैठकले स्वीकृत गरेको हो । यससँगै मुगुमा २ वटा निकुञ्ज स्थापना भएका छन् । यसअघि २०३२ मा रारा राष्ट्रिय निकुञ्ज स्थापना भएको थियो ।
डोल्पाको शे–फोक्सुन्डो राष्ट्रिय निकुञ्जसँग जोडिएको मुगुम कार्मारोङ गाउँपालिकाको डोल्फु क्षेत्रको करिब ९ सय ६ वर्गकिलोमिटर भू–भागलाई अलग गरेर सरकारले निकुञ्ज स्थापना गरेको हो ।
डोल्फु क्षेत्रका स्थानीय शे–फोक्सुन्डो राष्ट्रिय निकुञ्ज जान र आउन करिब एक साता पैदल लाग्ने भएकाले प्रशासनिक कार्यमा सहजीकरण गर्न नयाँ निकुञ्ज स्थापनाको प्र्रस्ताव मन्त्रिपरिषद्मा पेश हुँदा स्वीकृत भएको वन मन्त्रालयले जनाएको छ ।
मुगुम कार्मारोङ गाउँपालिकाले पनि शे–फोक्सुन्डो राष्ट्रिय निकुञ्जसँग जोडिएको भूभागलाई छुटयाएर निकुञ्ज बनाइदिन वन मन्त्री ऐनबहादुर शाही ठकुरीसँग पटक पटक माग गरेको थियो ।
